ANG ‘Tanging Ina’ ng Star Cinema ang huling comedy movie na nakapagpatawa sa amin nang husto, pero nahigitan ‘yon ng Ikaw Pa Rin, Bongga Ka Boy ng Viva Films.

Hindi namin inaasahan na matatawa kami sa mga eksena ng pelikula nina Ai Ai delas Alas at Robin Padilla na nagkaroon ng premiere night sa Cinema 9 at 10 ng SM Megamall noong Lunes.

Napatunayan namin na totoo ang sinabi ni Mel del Rosario (scriptwriter ng Ikaw Pa Rin) na may che­mistry ang team-up nina Ai Ai at Robin dahil napuno ng halakhak ng audience ang loob ng sinehan.

Manhid ang hindi maaaliw sa mga nakakatawa na eksena ng pelikula at sa mahusay na performance nina Ai Ai, Robin, Eugene Domingo, John Lapus at ang child actor na si Rhap Salazar na gumanap bilang alanganin na anak ni Robin.
Simple lang ang kuwento ng Ikaw Pa Rin, pero nagmukha itong bago dahil sa mga wacky scene at sa magandang script na isinulat ni Mel.

Tawa kami nang tawa sa eksena ni Ai Ai na nakalublob sa bathtub na punumpuno ng yelo habang background music ang Nananabik ni Didith Reyes.

Nakaw-eksena si Eugene na iba’t iba ang karakter mula sa mga primetime shows ng ABS-CBN at GMA 7.

Pinatunayan ni Robin na kaya niya na magpatawa kahit mas kilala siya bilang action star at drama actor.

Hindi namin namalayan ang oras dahil nag-enjoy kami sa panonood.