HALOS puno ang Tanghalang Nicanor Abelardo (CCP Main Thea­ter) nu’ng gala preem nu’ng Sabado ng Jay na pinagbibidahan ni Baron Geisler.

Ang direktor ng Jay na si Francis Xavier Pasion ay dating headwriter/producer ng docu-drama program ng ABS-CBN na Nagmamahal, Kapamilya (ni Bernadette Sembrado) kaya nakita rin naming nanood ang ilang executives at direktor ng Dos.

Nandu’n din si Direk Maryo J. de los Reyes na very proud sa kanyang ala­gang si Baron.

May karapatang maging proud si Direk Maryo dahil mereseng gaano kapangit ang image ni Ba­ron ay hindi maikakailang magaling siyang aktor at ipinakita niya ang husay niyang ‘yon sa Jay.

Ang pelikula ay tungkol sa gay TV producer na si Jay Santiago (Baron) na gumawa ng documentary report hinggil sa pamilya ng napatay na bading na teacher na si Jay Mercado (JC Santos).

Sa panghihimasok ni Jay sa pamilya ng biktima habang nagluluksa ang mga ito ay may mga natuklasan siya na itinatagong sikreto at lihim na pag-ibig ng kanyang pinaslang na katukayo.

‘Do not believe everything you see as truth’ ang babala ng first-time director na si Francis Pasion sa kanyang pelikula na isang nakakatuwang sulyap at komentaryo sa Philippine media.

Kung nagustuhan n’yo ang Bikini Open (2005) ni Direk Jeffrey Jetu­rian na ipinakita ang hindi kagandahang mukha ng ating local media ay maaaliw rin kayo sa Jay, na mas dinalirot pa ang isyu kung ano ang tunay na nagaganap sa likod ng kamera para makapaghatid ang media ng mga ‘makatotohanan’ at ‘maka­bagbag-damdaming’ kuwento ng buhay sa telebisyon.

Docu-drama ang hawak na programa noon ni Direk Francis sa ABS kaya alam niya ang kanyang sinasabi at nais ipa­kita sa audience sa Jay.

Sa pelikula ay real-life drama ang tema ang show ni Baron na nagtatampok sa mga biktima ng krimen, pero sa halip na ipakita ang totoo sa harap ng kamera ay mistula siyang direktor na minamanipula ang mga sitwasyon at eksena para gawing ‘cinematic’ at kaaya-a­yang panoorin sa TV ang kanyang report.

Malaki ang papel ng Ces Drilon-lookalike na si Flor Salanga sa istorya dahil ito ang gumanap na ina ng napaslang na gay teacher.

Sinadya ni Baron at ng kanyang Channel 8 crew ang pamilya nito sa Bacolor, Pampanga para kunin ang exclusive story ni Jay.

Ang lakas ng tawa­nan ng audience sa mara­ming eksenang ipinakikita kung paanong paglaruan at pakialaman ng media ang mga bagay-bagay alang-alang sa isang good report.

Mas maintriga at mas madrama ay mas bongga.
Ilang beses pinalakpakan ang karakter ni Flor, lalo na nu’ng mula sa pagiging isang naïve na ina ay nasanay siyang umarte sa harap ng kamera at animo’y isa nang propesyonal na artista.